18 апрель куни Бишкекнинг Первомайский туман суди журналист Семетей Талас уулуни экстремистик материалларни тарқатишда айбдор деб топди. Бу ҳақда Озодликка суд матбуот хизмати хабар берди.
Суд уни уч йил муддатга озодликдан маҳрум қилди, бироқ бир йил муддатга синов назорати тайинлаб, жазодан озод қилди.
Журналистнинг бу қарор устидан юқори инстанцияга шикоят қилиш ёки бермаслигини ҳозирча билмаслигини айтди.
2022 йил февраль ойида Семетей Талас уулу Миллий хавфсизлик давлат қўмитасида сўроқ қилинган. Кейин разведка хизмати унинг экстремистик материалларни тарқатишда гумон қилинаётгани ҳақида хабар берди.
Шу билан бирга, сўроқдан кейин Талас уулунинг ўзи ҳам журналистларга ўзининг Facebookдаги саҳифасида диний мавзудаги постларидан бири сабаб гувоҳ сифатида сўроққа чақирилганини айтди.
1 ноябрь куни журналист Миллий хавфсизлик давлат қўмитаси томонидан ҳибсга олинган. Талас уулу экстремистик материалларни тарқатишда айбланиб қўлга олингани маълум қилинган. 3 ноябрь куни у уй қамоғига озод қилинди.
Семетей Талас уулу жиноят ва коррупция ҳақида ёзадиган мустақил журналист сифатида танилган.
